ನಮ್ಮ ದೇಶದ ಹಿರಿಮೆಯನ್ನು ಹೇಳುವಾಗ ಸಾಮಾನ್ಯವಾಗಿ ನಾವು ಬಳಸುವ ಘೋಷವಾಕ್ಯ “ವಿವಿಧತೆಯಲ್ಲಿ ಏಕತೆ” ಎನ್ನುವುದು. ಅಂತಹುದೇ ಒಂದು ಭಿನ್ನ ನೆಲೆಗಟ್ಟಿನಲ್ಲಿ ನಿಂತಿರುವ, ತನ್ನ ವಿಶಿಷ್ಟವಾದ ಕಛೇ ಕಾರ್ಯವೈಖರಿಯಿಂದ ಹಲವಾರು ಮಹತ್ತರವಾದ ಕಾರ್ಯವಿಧಾನಗಳನ್ನು ಮೊದಲಿಗೆ ಜಾರಿಗೆ ತಂದು ದೇಶದ ಇತರೆ ರಾಜ್ಯಗಳ ಚಿತ್ರೋದ್ಯಮಕ್ಕೆ ಮಾದರಿಯಾದ ಸಂಸ್ಥೆ “ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ”. ವಾಣಿಜ್ಯದ ಉದ್ದೇಶಕ್ಕಾಗಿಯೇ ರೂಪಿತವಾದರೂ ಹಲವಾರು ಸಂದರ್ಭಗಳಲ್ಲಿ ಸಮಾಜಮುಖಿಯಾಗಿಯೂ ಕಾರ್ಯನಿರ್ವಹಿಸಿ ದೇಶದ ಗಮನ ಸೆಳೆದಿರುವ ಈ ಸಂಸ್ಥೆಯ ಅನೇಕ ಯೋಜನೆಗಳು, ಕಾನೂನು ಕಟ್ಟಳೆಗಳು, ಸ್ವಯಂ ನಿಯಂತ್ರಣ ವ್ಯವಸ್ಥೆ-ಮುಂತಾದ ಅನೇಕ ಕಾರ್ಯವಿಧಾನಗಳನ್ನು ದೇಶದ ಚಿತ್ರೋದ್ಯಮದ ಅನೇಕ ಸಂಘ ಸಂಸ್ಥೆಗಳು ಯಥಾವತ್ತಾಗಿ ಅಳವಡಿಸಿಕೊಂಡಿರುವುದು ಮಂಡಳಿಯ ಹಿರಿಮೆಗೆ ಸಾಕ್ಷಿ.